الأنسان الذي يؤذيك علمه لا يأذي أحدا من بعدك

الأنسان الذي يؤذيك علمه لا يأذي أحدا من بعدك:
سَمِعتُم أَنَّه قيل: "العَينُ بِالعَين والسِّنُّ بِالسِّنّ أَمَّا أَنا فأَقولُ لكم: لا تُقاوِموا الشِّرِّير، بَل مَن لَطَمَكَ على خَدِّكَ الأَيْمَن
فاعرِضْ لهُ الآخَر ومَن أَرادَ أَن يُحاكِمَكَ لِيَأخُذَ قَميصَكَ، فاترُكْ لَه رِداءَكَ أَيضاً ومَن سَخَّرَكَ أَن تَسيرَ معه ميلاً واحِداً.
فسِرْ معَه ميلَيْن متى 5 / 38-41
العظة الكبيرة يللي عملها يسوع للناس عل جبل
بهالعظة يسوع عم بيعلم الناس وأنا أوّلن شو هوي منطق الله يللي بدي امشي فيه مفهوم جديد , طريقة جديدة.
وهالعظة زعجت الفريسيين لأنو المسيح عم بيوعّي الناس قديش هني مهمين وقديش بيقدرو يقلبو المقاييس
وهالشي بيخلي الفريسيين بموضع حرج لأنو ما بقا يقدرو يضحكو عالناس وساعتا بيطير منصبن.
المسيح اجا يفتح عيونّا بالمحبة مش بالحرب

لا تقاوموا الشرير = لا تقاوموا الأنسان يللي بيأذيكن ليش ؟؟؟؟؟
الخد الأيمن = كرامتك
قميصك = ممتلكاتك
الميل = حرّيتك
أولاً:
من لطمك ... معناتا لما حدا بيهينك شو بتعمل ؟؟؟
أو بتسكت وساعتا بيكون يللي هانك ما تعلّم أو بتعيط وبتهينو وساعتا بيبطل معروف مين الشرير أنت ولّا هوي
وبالحالتين غلط : خلينا نتذكر لما لطمو ليسوع قلو يسوع: لماذا تضربني - قولكن من بعد موت المسيح قديش حس بالمحبة هيدا يللي لطمو
الفكرة انو يللي بيهينّي وصلّو حبّي بكلمة من دون ما إإذي ساعتا الروح القدس بيلعب دورو.
ما تخاف على كرامتك لأنو كرامتك من المسيح وما حدا بيهين كرامة الله يللي فيك - لأنو الله فيك بالروح

تانياً:
يللي بدّو قميصك ... عطي رداءك والرداء كان أغلى شي بالممتلكات الشخصيّة .
ما ننسى انو لما نصلب المسيح صارو يشوفو مين بدو ياخد رداءو والرداء هوي غطاك يللي بي غطيك
والمقصود
أ- بس حدا يحط عينو عممتلكاتك تكارم عليه لأنو أولاً ممتلكاتك من الله وتانياً بس يشوف انك بتحبو أكتر من ممتلكاتك ...
رح يشيل عينو عن ممتلكاتك ويصب عينو عليك ليفهم انت شو ... وعليك تدلّو عالمسيح
ب- عطي غطاك لخيك لأنو سترك هوي الله ... وهيدا مش كلام شعر ... لما تستغني عن كل واسطة وحارس
وسلاح وضمانة وتوقف حد خيك بدون شروط ساعتا ما حدا بيقدرلك لأنو الله غطاك وما حدا بيقدر يأذي الله

تالتاً:
من سخرك أن تمشي معه ميل ... على ايام الرومان كانو يبعتو اليهود يوصلو مراسيل مسافات يعني كأنو عبد وعم شغلو ... بس الحلو وين ؟؟؟
بدك تفرجي يللي بيطلب منك طلب انك حاضر لتخدمو وقت يللي بدّو ... ليش ؟؟؟
هيدا مش اذلال لأنو الذل هوي لما تعمل شغلة لحدا ما بتحبّو وشغلة مش حاببها وساعتها بيكاري عضهرك بلا ما يتعلم شي ...
الفكرة انك تتعلم تخدم للآخر بدون تأفؤف ساعتها رح يظهر وج الله عليك ويللي بوجك بيبطل عارف كيف بدو يرجع يخدمك

رابعا:
رح تقولو في ناس محجرة لو ضوينا صبيعنا العشرة ما رح يتعلمو أنا بقلكن : المشكلة مش بهالأشخاص , المشكلة بمحبتنا الناقصة
المحبة تمرين عضلات ... بدا وقت طويل وما بتكبر الا بالتمرين واذا ناطر انو حب أد المسيح فجأة,
يعني بعدني ما فهمت شو يعني درب الناصرة ... الجليل ... أورشليم ... الجلجلة .... الصليب ... القيامة

خلي يللي بيلتقي فيك ليأذيك ... تكون آخر مرة بيأذي فيها

يا مباركَ مباركيك، يا ربّ، ومقدَّسَ المتوكِّلين عليك، خلِّص شعبَكَ، وبارك ميراثك، إحفظ كمالَ كنيستِكَ،
قدِّس المحبّين جمالَ بيتِكَ، أنتَ عوّضهم عن ذلِكَ مجدًا بقدرتِكَ الإلهيّةِ، ولا تُهملنا نحن المتوكِّلين عليك.
هَبِ السلامَ لعالمِكَ ولكنائسِكَ وللكهنةِ ولحكَّامِنا وللجنودِ ولكلِّ شعبِكَ. لأنّ كلّ عطيّة صالحةٍ وكلَّ موهبةٍ كاملةٍ
هي من العلاءِ منحدرةٌ من لدنِكَ يا أبا الأنوار.
وإليك نرفعُ المجدَ والشكرَ والسجودَ، أيّها الآبُ والابنُ والروحُ القدس، الآن وكلَّ أوانٍ وإلى دهرِ الداهرين.
آمين