قاموس شامي - عربي

دشرو : يعني حل عنو
ماني غضران : يعني لست بقادر (وهي بالميداني)
يوه تشكلو آسي : يوه مفرده يأتي شرحها لاحقاَ
تشكلو آسي (بعيد الشر) تعبير يفيد شدة حب المتكلم للمتكلم عنه ....
الواه الواه : تعبير نسائي قح يفيد التمسخر على شيء ما
معبّا بـ بنطرون : يعني واحد أجدب وجاية يحكي
ولا : آداة تستخدم في النهر والشتم
وخنان : مسبة مانها ظريفة بس وضعت للضرورة اللغوية
دشّرني : أي حل عني ... وحل عني يعني اتركني بحالي
أيدي بزنارك : تعبير يستخدم للتعبير عن الرجاء
دخيل الله : أيضاَ تعبير والمقصود به هو الاستغاثة بالله
شعره متل الشوشة : أي أن شعره منفوش ومنكوش
وضرّاب السخن : وهي مسبة.. وتعني .... مابعرف مسبة وبس
يوه الواه الواه : مفردة شهيرة جدأ عند النساء وتفيد الأوية
كوكش : يعني يفتش
بحبش : أيضاً مفردة تعني البحث مع التمحيص
ينمحق : ويعني ينضرب على قامتو .. يسطفل
يبعتلو حمى : أي تصيبه حمى ويمرض
يتحورق : متل يبعتلو حمى
يتقوص : بنفس المعنى
يتأمع : كمان هيك شي
عود يقعد رزك : يعني خيلتنا حاجة تحوص
والمعنى الأدق: يقعد رزك يعني تموت والناس ياكلو رز.. لأنو من المعروف عندما يموت حدى بتصير عزيمة وبيطعمو الناس أوزي على روح الميت والأوزي أكلة معروفة بالشام
وين غاطط : وين مو مبين
والسبع تنعام : يعني إلنا الشرف
حيط بياخذو وحيط بيجيو : تقال للي بيسكر من كتر الترنح
مابيعرف الخمسة من الطمسه : عن الرجل اللي ماعندو ثقافة
سرّي مرّي : عاللي بيخفق برات البيت
شندي بندي : للي بيحكي بلا طعمه شروي غروي
فايت بالحيط – طاقق الفيوز : للدلالة على انو ماعم يلاقي كلمة مناسبة
مجنط : مفلس ولا قرش
كحته : إيدو ماسكه .. بخيل
شاطط ماطط : يعني مدلع زيادة
نعيان : يعني قلبو بارد
نايط = نعيان = بارد
شاضومه : بنت مجلوئة .. يعني كيف بدي إلكن .... قليلة أدب ومصبينه
شحاطة : مايلبسه المرء في قدمه عندما يكون في المنزل
تعسيله : نومة بعض الظهر
مسرسبة : يعني بتحب النظافة كتير
أسسييع أوعى الزيت : بمعنى وسع وفسح طريق
أغّيييييى : هي للأبضايات وبس
تأكلو الدودة العميا : يعني الواحد يموت وياكله الدود بعيد الشر
يبعتلو أتلو شو سمج : كمان يعني يموت وسمج يعني غليظ ..
موسوس : مهووس بشغله
عقلو جوزتين بخرج : يعني عقله صغير
متل الأطرش بالزفة : يعني مالو علاقة بالموضوع
حاج تحوص وتلوص : يعني حاجة تفتل وتدور
شوية لرخار : بعد شوي
بنت عمي : يعني مرتو وطبعاً بالعكس
وهذه كلمات متداولة فقط عند أهل الشام الأصليين
خطف الكبيه من راس الماعون : ومعناتها ان الشخص بياخد اول الكلام وبترك الباقيه
بيقطش وبيلحش : معانها انه ما بيعرف شو بيحكي
يضيع غريمك : معناتها تنقتل وما يعرفوا مين قاتلك
حاج تسهتن [ تنفع للمذكر والمؤنث]: معناها ان الشخص يدبل وانت بتحكي معه
يقطوعك على كل جبل شقفه لا تنلم ولا تنجمع .................... مفسرة
سد نعيك : سد تمك او اخرس
سد بوزك : نفس المعنى
تجيك حمى سبع شكال : يعني ان الشخص ينصاب بكل انواع الحمى المو جودة وعذروني ما بعرف عددها
تجيك حمى وبرديه : ومعناتها ان الشخص يسخن ويبرد بنفس الوقت
تضرب شو ما صل : بتنقال لشخص يلي بيحكي ساخافات
متل سهيان او سهيانه : وبتنقال للشخص يلي بيعمل شي وبيخبي
يتالن وبتصير يتالنوه :بعني جمع ومفر ومؤنث عم وجب الا نتباه الى تضخيم لام يعني ما هتموا فيه
طنشه : نفس المعنى
زبله : نفس المعن يعني تركه
ولي على كسرتك : ممممممممممممممم صدقوا ما بعرف معناها
عم يعلم عليك او تعلم عليك : يعني بياخد شي منك وبيضل بيهتك وبيهتم مهناها بيضل دائما بيذكرك بشي انت عامله
الحمى يلي تسلقك او تقشك : واضحة
سلال او سلا له : الشخص يلي بين انه منيح وهو زفت
المنيح : الجيد
ارنه : تدل على المكان
وقف على سوكه : يعني وقف بزاويه الشارع

مع ملاحظة قراءة كل حرف ((ق)) ((أ)) ، مثال ((تمحق)) ((تمحأ))

شكرا عالموضوع ..بس أنا عندي سؤال مين أكبر القاموس الشامي ولا القاموس الصدي
يعطيك العافية ..

اعتقد ان القاموس الصدي اصعب لأن فيه كلمات كثيره اصلها من اللغه السريانيه

شكرا... الصدية فيها من كل اللغات واللهجات ..وفيها كثير أصله تركي وسرياني
شاروخ ..شاموط ..شرنة ..شلخة ...سلخة ..دشة ..مشوحط ..مشلوط ..مشروخ ..مشحوط ..مشرمح
نكتب بعد ولا نخليها مستوره ..

لقد وجدت هذا القاموس للهجـــة الصديه على موقع شبكة الحفر.

http://www.alhafer.com/alhafer/pages.php?id=8

جورج شماس ...بكفي شرشحة ..لهون وبكفي ..خليها مستورة ..في إلكم نكثة مع المذيعة ماريا ديب
ماحدا بينساها ...أشكرك على مشاركتك ...


..................
أستاذ جورج شكرا عالموضوع ...فعلا من الروائع ..ولكن بما أنو في من الحفر بموقعنا ولكن مابحبوا يزورنا ..
يمكن حطك للرابط رح يزيد بمواقعهم موضوع ..هلق بيتهمونا بالسرقة ..

مصطلحات حمصية

علاي: عليه، مثل الحق علاي وتعني أنه ه...و المذنب أو المقصر في الأمر
شوية اللخر (أو اللخار) : بعد شوي ..
تعا كل يوم : أداة للتخويت
حسن صبي: بنت مستزلمة
زكُوْرْت : زلمي (رجاااااااال يقبرني شو رجال) من الخالدية، باب السباع، باب الدريب، باب تدمر، جورة الشيّاح وهالحارات القديمة
شووو مشان : أداة للتساؤل
خملت: أي حسبت (ظننت)
طلاع من راسي : حلّ عني
ماااااااااخرج : أداة للنهي و التملص
كفوووو : أداة نفش
كبييييييييير : كمان أداة نفش
وجع: تعني وحسكة وعلة
سرسري : شخص صاحب مشاكل كتيرة (مشكلجي)
محسوبك : خدام شورابك
طنط : شب محسوب بالغلط عل الشباب
اقطعله كرت : يعني احلقله عالناشف
الله يمنترك ؟؟؟؟ لا اعرف شرحها مرة بقولوا لشي منيح ومرة لشي لأ
تنزل عليك النزلة .................. دعوة خفيفة على حدا<p
مفشكل : أي غير مرتب ولها مرادف مخربط
بفرد مرة = معا
يندفس ......يعني ينام
يئبر بعضو......يعني يصطفل شو بنعمله
أبو شمسو اشهر بياع حمُّص بأبو العوف
عمنوَّل وتعني السنة الماضية
أول عمنوَّل وتعني السنة ما قبل الماضية
شلافيط تعني ساخن جداً او حار جدا
حاجي عاد ................. أداة طلب للتوقف عن فعل أو قول
حبالتاي...................... وا أسفاه عليه
يتربح خطيتا............... يحمل ذنبها
ولآن الجوع.............. جائع كثيرا
كماجي................... رغيف خبز
عم يبرطن............... عم يثرثر
عم يأفلم ............ عم يتخوت
مشلبن................. ناعم
مصرصع ............... ضعيف جدا
مسحلل ...................... كمان ضعيف
منظنظ .................. ناعم زياده
مزوزأ .................. شديد الاعتناء بنفسه
مون ون .............. موسوس
مونَئ .................. ما بيعجبه العجب
مبرطم ................. على قد مانه آخد موقف برزت شفته الأمامية
مسودن................ شديد النظافه
مكرشن ................. مزموم
مكرِّش .................. أي صار له كرش
مطبلج .................. سمنان
متصربع .................. جالس ونافش حاله
أريضه.................. لا معنى لها بتقولا إذا شي دايقك أكتر من مرة
زرز............... دمه خفيف
أبّوع .................. وهو ما يوضع فيه الايس كريم
كُبّاي .................. قرص كبه
المباراي هي المباراه
كمشة تعني شوي
جاموقة: بركة المي خاصة بعد المطر
مأآآآآطخ : آخذ وضعية منحنية
مطبوز : حردان
هايشي: و معناها أجدب أو جدبي وتطلق على المذكر والمؤنث على حد سواء

مصطلحات حلبية -

امتازت اللهجة الحلبية عن غيرها من اللهجات السورية بأنها فريدة من
نوعها ولا يوجد لها مثيل على الإطلاق واليكم بعض المفردات الشائعة الاستعمال
جدبه : يعني مجنونة
سكرتون: يعني خزانة
أبوس روحك : للمدح
ورصاص : يعني دعاء بالموت وأيضا
يبلاك بقتلك يعني دعاء بالقتل والضرب
لاتجقجق يعني لاتدوس على الماء ( هي إذا كان الأرض مغسولة)
بتاتا يعني البطاطا (البطاطس )
مجأجأ ...... مرطب
عوجه .... كوع
خلق .... عالم
و كلكم تعرفون أغنية فيروز ( شئد في خلق عالعوجة تنطر خلق )
كما امتازت اللهجة الحلبية .. بأدوات إشارة خاصة فينا .. يعني العرب كلهوهن كوم
.. ونحن كوم تاني .. وهنن
كوهنه ... للمذكر القريب
كيهنه .. للمؤنث القريب
كوهاك .. للمذكر البعيد
كيهاك .. للمؤنث البعيد
كوهاكيي .. لجمع المذكر البعدين
كيها كين .. لجمع المؤنث البعدين
كوهنن .. لجمع المذكر القريب
كيهنن .. لجمع المؤنث القريب
وطبعا للسهولة في اختصارات كمان
اختصار المذكر القريب . . كو
اختصار المؤنث القريب .. كي
ههههههه الله وكيلكون هي بس مفردات الإشارة .. بس مشان تصدقوا شقد
لهجتنا نحن الحلبية غنية ..
روح قلبنا نجقجق
ومن الأختصارت أيضا
تاااا بدل من تعال
رووو بدل من روح
ما راي بدل من مالي رايح
أبخالتي بدل من ابن خالتي
شأساعه بدل من شقد الساعة
أشلك فصتون يعني بالشامي شو بدك فيون
ونانتي يعني جدتي
وكمان :
جنق ... هي الصحن
فرتيكه .. هي الشوكة
خوليه .. هي البشكير
أرمغان .. هي الهدية
جمجايه .. ههههههههه هي يعني معلقه السكب المقعرة
اللهجة الحلبية ومفرداتها
أستنوا لسا ماخلصت اشبكن في كمان
خيت وخيتو --- يعني أختي
خاي وخيو ---يعني أخي
جلق --- دمه ثقيل
اشبك --- سؤال استفسار
وجع --- دعاء بالألم
خوته --- معه صراع
فلته --- واحد شاطر
كرتاية ----> سكجا يلي بتدخل فيها اكندرة
أنضرة ----> الكندرة
باذنجان----> بانجان
دي بقا ----> لك لك
علوّا .... أي يا حبذا

وللدقة باللفظ يرجى لفظ ال ج : ادجه
وال ش : اتش

شكر أستاذ جورج ...شايف أنه يلزم لنا معاجم وقواميس عديدة ..
وحقا أنا أعرف فتاة سورية تعيش مع أهلها في أسبانية بقيت حوالي سنة في حمص لتكتب موضوع عن
جامعي حول اللهجة الحمصية وزودتها الجامعة في إسبانية بالمادة ..
كما أن هناك شاب سويدي من أب عراقي وأم سويدية عاش في بغداد مايقارب 7 سنوات ليتعلم اللهجة البغدادية وبعد عشرة سنوات أستطاع أن ينجز قاموس عربي سويدي ولكنه يبحث في اللهجة العراقية ومايقابلها في اللغة السويدية .
شكرا لكل من ساهم بالموضوع

مصطلحات ضيعة ضايعة
(أظن الضيعه من الساحل السوري)

أبّع ركيد = أسرع بالركض
آبول = موافق من كلمة قابل
اتلسّع = اتناول الطعام
أدّوم = مطرقة
استحكيه = تكلم معه
ألاشين = جوارب
انئلع = أغرب عن وجهي
انعفطوا = انكمشوا = ألقي القبض عليهم
آي آي = نعم نعم
اينجنور = مهندس
بحّتو = ضربه ضربا مبرحا
برغاليا = بلغاريا
برطيل = رشوة
بريديت باردو = بريجيت باردو
بزّاقة = من الحشرات الزاحفة
بعّئ = اصرخ
بنشر = جنّط
تاسومة = صرماية = حذاء (سريانية)
تخّر = أفسح الطريق
تخريجة = درخوشة = ثغرة
تضرب بنيعك = عليك اللعنة
جعاري = عالي الصوت
جفت = بندقية صيد
حرمباية = الحرباء من أنواع الزواحف وقد أخطأ المؤلف حين قال إنه نوع من الزواحف دون الإشارة إلى أنها الحرباء
حلّ عنّو = دعك منه
حليئ = إذهب من وجهي
جلجوء = لاقيمة له
درمل = إذهب بسرعة
دشّر = دع
دلدوء = منافق أو من لا قيمة له
دينتي = أذني
ترخّ عليه = تثقل عليه
سجرة = شجرة
سدّو لباجوقك = سدّلي نيعك = سدّ بوزك = أغلق فمك (عن الكلام) ويقال بأسلوب إهانة
سلاقي = من أنواع الكلاب والفصيح هو سلوقي
شبك؟ = ماذا بك؟
شحّاري = شحميطي = شحّاراسي = يا للمصيبة
عزرط = لا يقدّم ولا يؤخّر وهي من الكلمة العربية الفصيحة عضروط أي التافه
عيٌن = انظر (وهي الكلمة الأكثر شيوعاً في المنطقة)
غلونجي = أسعاره مرتفعة
فا = فهنه = يوجد
فدّان = ثور
فرخ افوكاتو = محامي مبتدئ
فوّامات سواجير = فلاتر السجائر
قضّوضة = سندويشة = شطيرة
كعرو = قلّعو = طرده شر طردة
كرفتّا = كرافة
كزدانة = باقية
لاطي = مترقب بحذر
لبود = انتظر بهدوء
ضحكتو لقراميش دينيه = ابتسامة عريضة
طأمش = البس الطّقم
ماعن طيبي = عن غير قصد مني
ماحود = شي ما
مجعوز = مزعوج = منزعج أو متضايق
مدير الريجي = مدير مؤسسة التبغ
مشبوح شبح = ملحوش لحش = ملقى بإهمال
مصرات = مصاري = نقود
ميتور = دراجة نارية
ناجس = بشكل نهائي
نسفئون = نطرقن = نتناولهم(للأطعمة و المأكولات)
هبّور = شرشوح
هفاه هفي = هفهنه هفي = أزاله تماماً
واح = واحد
ولا = أيّها (أداة لنداء غير المحترمين)
يا حيفات = وا أسفاه
يبريني عن ديني = قسم بمعنى:' أكون خارجا من ديني إذا حصل كذا وكذا' وهو فسم خطير ومذموم، وفضائية أبو ظبي ألغته من كل الحلقات لأنه ينافي تعاليم الدين الإسلامي.
يبلفوهم = يحتالون عليهم
يحمّك = دعاء بمعنى فلتصب بالحمى
يعركس = يعرقل
يكحشوهن = يطردوهن
ينبّز = يظهر

معظم هذه الكمات تستعمل في لغتنا العاميه في فيروزه ولقد فهمت أكثرها
دون قراءة الترجمه ولكني لم أكن أعلم أن معظمها تركيه أو فارسيه؟
يعني إذا سافرت إلى تركيا يومآ ما فيٌ مشي حالي وما بموت من الجوع ههههه