هذا رائع جدا

هذا رائع جدا أن نرى ديواني الشاعر جون في هذا الموقع الجميل وصدقوني لو في عشرة من أمثاله في فيروزة بمحبته وغيرته وتسامحه ونشاطه الثقافي لخدمة فيروزة ماكان صار بضيعتنا اللي صار ومع أني من زمان مافت عالموقع شكرا لإدارته لأنو هو البوابة الوحيدة اللي فيها نكتب ونقرأ ولو كان كرت الأنترنيت بكلف .
تحياتي لكم

قصة ضيعتين {الجزء الأول-زيدل }
fahed tahan
..............
بدّي احكي احكاي عن ضيعة صغيري وحلواي
صارت قصّتها روايي حديث الناس وتسلاي
صارت ضيعة مشهورة لمّا صارت بالصورة
طشّوا ولادا بكلّ الارض وما وسعتهن معمورة
مين بيذكر البدايي: تنّور وفحم وشوّاي
طنبر عجل ومعزاي
بهاك الحقلة والبورة
بيت المونة وأنّ الجاج
والورد معشبأ عاسياج
عا ضوّ الشمعة وسراج
ندور الحارة ونزورا
شجرة عفص وشجرة توت
وخروف بحدّا مفلوت
نسهر تحتا كبار صغار
ناكل كبّة و سختورة
والسهر ولعب الشدّي
والنومي دون مخدّي
بعد التعب كلّ النهار
والفيقة قبل العصفورة
فارس طرنب ابو ناصيف
يا ستّار ويا لطيف
كان جدّي شريكو غلطان
والقصّة صارت اسطورة
ضربوا زعلة ثلت ايام
من وقتا ما عدنا انام
عملوا صلحة اهل الحي
والتحلاي نمّورة
والبيرومسكبة الخس
الجاروشة ومعصرة الدبس
وثياب المو مثل اللبس
مشلوخة او مطرورة
يا زيدل يا معتزّي شو خلاّكي مهتزّي
عشت فقيرة طول الدهر
رضياني بحالك مسرورة
شو اللي جرا وشو اللي صار
اهلك ما عادوا بالدار
وامنسمع عنهم اخبار
لا ضحكي ولا دهدورة
صار الامريكي يروح
مليان وجيبو مفتوح
والناس يجن اجنانا
تبات وتصبح مقهورة
والشاطر طلّع بسبور
وعا فيزا بلّش يدور
لا شغلو ما عدلو نفس
وباعا بقشرة بندورة
والحلوي بعمر الجازي
لو تصفا عالعكّازي
الا بأمريكي ما بترضى
والجملي صارت مأثورة
والشبّ اللي كلّو طموح
عطر الوردي منّو يفوح
قرش بايدو مش ملموح
عم يبكي عالمكمورة
عالفيزا ألّفنا اغناني
أوف وأه وعالماني
صارت تسوا بالمليون
وأكثر من ثمارا بذورا
هدّي يا ضيعة هدّي
عن عقلك لا لاتعدّي
العيشة هوني مثل هنك
والجرّة هيّي القارورة
حاصلها جينا الغربي
ويا عيني ملّا سلبي
شغل وركض كلّ نهار
ولو رجلك كانت مكسورة
صرنا نندب عالماضي
بهالعيشي ما حدا راضي
حتّى الرجعة للّي راح
فكرة صارت محضورة
تغرّبنا وكان اللّي كان
وغريب ببلدك يا انسان
عم تبرم مثل ما حصان
داير حول الناعورة.

قصة ضيعتين {الجزء الثاني فيروزة }
fahed tahan
............
فيروزة بتخطر عا بالي
ضيعة امّي واخوالي
ليكي بودّي مرسالي
يا بلادينا المعمورة
فيروزة امّ الحلوين
فيّ وميّ وبساتين
بعيوني احلى من الصين
أو باريس وقصورا
تلّ بلّان وتلّ حينون
والقعدة حدّ الكانون
وجدّي يحكي حكايا
عالخضر وعيد الشعبورة
جدّي كان يلبس شروال
كان لبيّو هوّي قال
ربّيت ولادي من دون مال
ونحمد الله مستورة
ستّي تطبخ عالببّور
وتخبز خبزا عالتنّور
والله مشتاء لستّي
وخبزا وريحة تنورا
بزوّادة عروسة سكّر
فلّاح لحقلو بكّر
الرجعة بعد غياب الشمس
لمّا بتحلى الكزدورة
بهالضيعة شفنا شوفات
شي بشيّب هالشعرات
مسطول وعامل نهفات
خطب البنت الأمّورة
كانت حلوة بعمر الورد
والبرعم ما فتّح بعد
جات الدنية بليلة سعد
شبه العذرا بالصورة
قالوا بأمريكا بيصير
فهمان وأديسون أو مليير
ما شافت الا التعتير
فقدت عقلا معذورة
والبنت اللّي بدّا تسوح
عا فيروزة بدّا تروح
بتعرف حالا بدّا تنال
شيوخ الضيعة ونسورا
عرجة.....قالوا ما بتعرج
نكدي....لكنّا بتهرج
حفيوا وراها بين التّولّ
حتّى عمارة كدّورة
فيروزة يا فهيمي
كيف ضيّعتي هالقيمي
هجموا أهلك عالغربة
وكانت هجمي مسعورة
عالمكسيك والاكوادور
وكلّ العالم صرنا ندور
حتّى أمريكا نوصل
وبعدا نوفي النذورة
عشنا بين حلّ وترحال
ضاع العمر والآمال
ما ضلّ منّا اللا خيال
وصرارة دوما" مصرورة.

قصة ضيعتين { الجزء الثالث-العبرة}
fahed tahan
............
أصعب شغلي بهالحياة
انّك تدفع هالبلاّت
فكس وتكس وتليفونات
والشاطر بقولّك هات
رح تتعب حتّى الممات
ورح ترتاح بالجورة
عم تحلم بي يوم رجوع
تضوّي الدنيي فيه شموع
تتشوف حالك عالموجوع
والحلوة الكانت مغرورة
بيغرينا معدن برّاق
والحضارة وقشورا
والحلى منّو بالساق
ولانّو بقصر التنّورة
لا تلحق وشّ المصبوغ
تفتكرا حلوة غندورة
هالشغلة منها مفروغ
بتغريك الدار من سورا
والبيض ملوّن بالعيد
بيصبح بيضة مقشورة
بياض وصفار ما في جديد
صارت شغلي محزورة
صيّاد المانو هدّاف
البارودة بايدو ماسورة
والقاضي المانو عرّاف
زايد عالدنيا شرورا
بتعطي نصيحة مابتفيد
لو كانت جيبك منخورة
بتكتب قصّة ما بتزيد
لولا تصبح منشورة
سمع منّي لا تكون عنيد
عندي نصيحة صغيّورة
مابفيد حسرة وتنهيد
ودموع الندم المنثورة
طنّشها بتعيش سعيد
عليك الشغلة مأصورة

سلمت يداك يافارس
وتحية لكاتب الكلمات
مع أجمل تحياتي

_________________
هذا رائع جدا 2-1410

» مناجاة النصف الثاني
» شعر رائع وجميل خال من التشابك
» موقع رائع Poqbum
» مؤلم ولكن رائع
» أغاني وديع الصافي أبو فادي